ನೆಲವಿಲ್ಲದ ಭೂಮಿಯಲ್ಲಿ ಪುಟ್ಟಿದ ವೃಕ್ಷದ ಬೇರ ತಂದು
ನೀರಿಲ್ಲದೆ ಅರದು ಗುಳಿಗೆಯ ಕಟ್ಟಿ,
ಕಣ್ಣು ತಲೆಯಿಲ್ಲದವರಿಗೆ ಒಂದು ಗುಳಿಗಿ,
ಕೈಕಾಲು ಇಲ್ಲದವಂಗೆ ಎರಡು ಗುಳಿಗಿ,
ಸೂಲದವಂಗೆ ಮೂರು ಗುಳಿಗಿ,
ಹಿರಿರೋಗದವರಿಗೆ ಆರು ಗುಳಿಗಿ,
ಈ ವೈದ್ಯಕ್ಕೆ ನಿದ್ರೆಯ ತೊರದು
ತಣ್ಣೀರು ತಂಗಳನ್ನವನುಣ್ಣದೆ
ಬಿಸಿನೀರು ಬಿಸಿ ಅನ್ನವ ಸೇವಿಸಬೇಕು.
ಈ ಪಥ್ಯವ ಪಾಲಿಸಿದವರಿಗೆ ಗುಳಿಗಿ ಸಾಧ್ಯವಾಗಿ
ಸರ್ವಸಿದ್ಧಿಸುವುದು.
ಕಾಡನೊಳಗಾದ ಶಂಕರಪ್ರಿಯ ಚನ್ನಕದಂಬಲಿಂಗ
ನಿರ್ಮಾಯಪ್ರಭುವೆ.
