ಸದ್ಭಕ್ತರಾದವರು ಸ್ಥಾವರಲಿಂಗದ
ಭಜನೆಯ ಮಾಡಲಾಗದು.
ಮನದಲ್ಲಿ ಸ್ವಾವರ ಘನವೆಂದು ನೆನೆಯಲಾಗದು.
ಅದೇನು ಕಾರಣವೆಂದೊಡೆ:
ಆದಿ ಅನಾದಿಯಿಂದತ್ತತ್ತಲಾದ ಮಹಾಘನಪರವಸ್ತುವನು
ಶ್ರೀ ಗುರುಸ್ವಾಮಿ ಭೇದಿಸಿ ತಂದು,
ಇಷ್ಟಲಿಂಗವೆನಿಸಿ ಕರಸ್ಥಲದಲ್ಲಿ ಕೊಟ್ಟ ಬಳಿಕ
ಆ ಲಿಂಗದಲ್ಲಿ ಸಕಲ ತೀರ್ಥ,
ಸಕಲ ಕ್ಷೇತ್ರಂಗಳುಂಟೆಂದು ಭಾವಿಸಿ,
ಮುಕ್ತಿಯ ಪಡೆಯಲರಿಯದೆ
ಖಂಡಿತ ಬುದ್ದಿಯಿಂದ ಬೇರೆ ಮುಕ್ತಿಯ ಪಡೆವೆವೆಂದು
ಕಂಡ ಕಂಡ ತೀರ್ಥ ಕ್ಷೇತ್ರಂಗಳಿಗೆಡೆಯಾಡಿ
ತೊಳಲಿ ಬಳಲುವ ಭ್ರಷ್ಟಭವಿಗಳಿಗೆ
ನರಕವೇ ಪ್ರಾಪ್ತಿಯಯ್ಯಾ ಅಖಂಡೇಶ್ವರಾ.
