ಪರತರಶಿವಲಿಂಗವೆ ಗುರುಲಿಂಗಜಂಗಮವಾಗಿ
ಧರೆಯ ನರರನುದ್ಧರಿಸುತಿಪ್ಪುದು ಕಾಣಿರೊ,
ಅದೆಂತೆಂದಡೆ: ಅಜ್ಞಾನವೆಂಬ ಕತ್ತಲೆಯ ಕಳೆವಡೆ
ಗುರುಲಿಂಗ ಕಾರಣವಾಗಿಪ್ಪುದು ಕಾಣಿರೊ.
ಒಳಹೊರಗಿನ ನೋಟಮಾಟದ ತಿಳಿವಿನ ಬಳಗಕ್ಕೆಲ್ಲ
ಶಿವಲಿಂಗವೆ ಕಾರಣವಾಗಿಪ್ಪುದು ಕಾಣಿರೊ.
'ಜ್ಯೋತಿಷ್ಮದ್ಭಾಜಮಾನಂ ಮಹಸ್ವತ್' ಎಂದು
ಕೂಡಲಚೆನ್ನಸಂಗಮದೇವನ ವಚನವಿಪ್ಪುದಾಗಿ
ಗುರುಲಿಂಗಜಂಗಮದ ಪಾದೋದಕವೆಂಬಮೃತವ ಸೇವಿಸಿ
ನಮ್ಮ ಶರಣರು ಜರಾಮರಣರಹಿತರೆನಿಸಿ
ನಿತ್ಯಮುಕ್ತರಾದರು.
