ನಾಲ್ಕು ಮಠ ನಾಲ್ಕು ಜಂಗಮಸ್ಥಲವೆಂಬ
ಕಂಗುರುಡರ ಮಾತ ಕೇಳಬಾರದು.
ನಾಲ್ಕು ಮಠ ನಾಲ್ಕು ಜಂಗಮಸ್ಥಲವಾದರೆ
ಬಸವೇಶ್ವರನ ಕಾಡಿಬೇಡಿ ಉಣ್ಣಲ್ಯಾತಕ್ಕೊ?
ನಾಲ್ಕು ಮಠ ನಾಲ್ಕು ಜಂಗಮಸ್ಥಲವಾದರೆ
ಬಸವೇಶ್ವರ ಪಂಚಪರುಷ ನೋಡವರೆ?
ಅದೇನು ಕಾರಣವೆಂದರೆ-
ಪ್ರಭುವೆಂಬ ಜಂಗಮ ಅನಂಗವೇಷದಲ್ಲಿ ಬರಲು,
ಬಸವೇಶ್ವರನ ಭಕ್ತಿ, ಮುಕ್ತಿ ಪಂಚಪರುಷ ಏನಾದಿತೊ?
ಮಾಡಿದ ಬೋನ ಪದಾರ್ಥವೆಲ್ಲ
ಬಯಲು ಬಯಲಾಯಿತೋ
ಅದೇನು ಕಾರಣವೆಂದರೆ-
ಸೂರ್ಯನ ಉದಯಕ್ಕೆ ದೀಪದ ಬೆಳಗು ಹ್ಯಾಗೆ ಹಾಗೆ.
ಇದು ಕಾರಣ ನಾಲ್ಕು ಮಠಸ್ಥಲಕ್ಕೆ
ಬಸವೇಶ್ವರನೆ ಗುರುವು, ಲಿಂಗವೆ ಸಂಗಯ್ಯ ದೇವರು,
ಜಂಗಮವೆ ಪ್ರಭು ಕಾಣಾ
ಎಲೆ ನಮ್ಮ ಕೂಡಲ ಚೆನ್ನಸಂಗಮದೇವಯ್ಯ.
